الانتحار .. وسوسة ابليس الانس و الجن

بقلم : درصاف المهري

الانتحار حسب ما قرينا و علمونا ما يجيبش الشهادة اللهم شهادة منتحر..هكاكا تجيب مع ملاحظة قادر على الافضل عليه بمزيد العمل….. الثورة اندلعت اول شرارة ليها بشخص شعّل النار في روحو ما يهمناش في الاسباب و التداعيات والمخلّفات لأن الدنيا لكل اسباب كي تجي تشوف..اما «مشاكل اليوم ما بدها حل امبارح.» سايي مرة برك هاكي مش لوبانة……..الظاهرة هذي ولات لاموضة قال شنوا تعبيرا على الظلم و القهر و الفقر.باهي نمشي معاك قد مخك..الي يعبّر المفروض يستنى العدد متاع تعبيرو بش يشوف روحو ناجح والا مدوبل…اما الي يعبر بالموت جبان وخواف هارب في بالو بش يلقى كونترا خدمة تحت التراب ……الناس قبل الثورة ذاقو الويلات من ظلم الانظمة المستبدة والديكتاتورية وصلو اولادهم اتقتلو قدّام عينيهم و امّاتهم اغْتُصِبنن قدامهم و رجالهم قطعوهم قدام اولادهم و و و.. بل ما كانش عندهم حرية التعبير كما تو كان القهر دوبل لا و الله …ومع ذلك ما سمعناش بالناس تحرق في رواحها منهم لا قبل وهوما مكتفين لا تو بعد ما اتحررو…..علاش ما عملوهاش زعمة؟ ماكانش فما ايصونص والا ما يطاوقوش ريحة الشياط ؟ قداش الروح رخصت و قداش الناس بعدت على ربي..ولبستها شواطن الانس والجن ..وخاصة الانس الوسواسة الخناسة … الاقدام على قتل النفس والرمي بها الى التهلكة و المصايب و الموت وانت تعرف مسبقا أنها مصيبة عند ربي وعند العبد. ما يكتبكش عند الله شهيد هذا اش قال ربي ما يجيني حد يقلي سبعة من اربعطاش خيرما ترصيلي نسأل فيه عن سورة الفاتحة باش تبدا و يقعد في احراج ما يعرفش فاش نحكي…..قيل ان الغريق و المحروق ينزل منزلة الشهداء. اما هاكا كيف يقدر عليهم ربي من غير تدخلهم هوما ويكون المصاب خارج عن نطاقهم ومش اختيارهم وما يخططولوش مع سبق الاصرار والترصد و يعملو فيدو كما عملو الصحفي في القصرين لبارح و متصور يتكيف وفي حجرو دبوزة ايصونص في راحة راحتو في قهوة و يقول فاها ويعاود هاو بعد شويا بش نحرق روحي تقول علينا مكذبينو اتفضل اقصد ربي يخي بش تعز علينا نفسك اكثر منك ؟؟ والغريب انو قبل الي يراوه يشعل يطفيوه بالماء و إلا حاجة الصوف والا حتى ب بالة مرمّة وتو تبدلت الاحوال ولاو يطفيو باللايف في التلفون يصوروه يتحرق وتسمع كان يا لطيف واللطف ويقربلو يحب يصورو عن قرب والراجل يتشوشط و ينقز وهوما قريب يكشّو عليه ويقولولو تي اركح خلي تطلع التصويرة مريقلة مش فلو…!!!! هذا اش علمتكم الثورة؟ تحرق روحك؟ باهي ومن بعد؟ تقعد امك مجلوطة و بوك حطيطة بالسكر واخواتك يعديو عالبوصوفير و اصحابك يقطعو ويريشو يقولو برجولية حتى هو كثرلها ويوري في روحو…اااا..اش ربحت انت واش ربحو هوما..وكان في بالك بش تضحي بروحك بش تعمل ثورة اخرى نقلك عملوها قبلك برشى حرقو رواحهم فبهم الي قعد رهينة في تركينة معمل على الوالدة تهزو لبيت البانو و فما الي اشتاق عمرو يحلم بالتشغيل مع منكر و نكير…الي يحب يحتج يعطينا من وقتو ويقص على طرح الخربقة ويقص عالشيشة الي مهبطها بالكردي في قهوة الحومة ويمشي يصوت في الانتخابات و يختار شكون الاصلح للبلاد تو عاد ماعاد شي مخبي و عرفتو شكون معاكم وشكون ضدكم تباركالله ندخلو لبروفيلاتكم نحسو رواحنا في بلاطو تلفزي الي تعرفوه انتوما على رواند السياسة والسياسين ما يعرفوش امالي المول…اعترض بالصندوق و طالب بحقك بالقانون..واتظاهر ميسالش كان الي اخترتهم كذبو عليك اما بلا سترات حمرا ولا روز بالفاكية ولا سلاطة بالكرمب…كون راجل و آقف لروحك ولولادك ..

 

محرز العماري

محرز العماري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *