العروض الصوفية .. اعطونا الفن نعطوكم وذنينا و فلوسنا

درصاف المهري
 اكيد لكلنا نحبو ميزان البنادر والبخور و الجمل الموسيقية الي تحرك فينا مشاعر روحانية لا يمكن تفسيرها بمجرد حروف او.كلمات او حتى نصوص…لكن لما تكون الموازين هذي ممسوسة ومش صادقة وفارغة وتخلوض المواطن البسيييط والبسييط جدا في امكانو انو يلاحظها ويبطل عالتصفيق والشطيح وكأن حاجة دخلانية روحانية ما مشاتش مع الجو و الكورون ما وصلش…ولو تكون ريحة بخور ..فيسع الروح تفيق بالنوعية الباهية والي تضرب في البندير وبرا..بعد حضرة النوبة القديمة للفاضل الجزيري و الحضرة1 طبعا قعدنا مدة طويلة معدلين مخاخنا و وذنينا عليهم..وبعد عمر طويل جات الزيارة للمخرج الاول المؤسس فيها سي رضا عزيز و لسامي اللجمي..نمط جديد و فما ما تسمع وما تتفرج اخراجا وتنظيما واختيار الاصوات والاناشيد الي تمشي مع كل صوت .هذا في حد ذاتو قمة الخدمة ..قعدنا كيف كيف مدة لاباس بيها معدلين عالزيارة وبعد بدات تظهر عالساحة مجموعات اخرى في محاولة للنسج على منوال الزيارة وهذا لاهو عيب ولا حرام وماذابينا تتعبا البلاد بالفرق خلي يشيخونا بالمدائح ياريت..لكن فما شكون احترم قواعد المهنة و حرص على بروتوكول النوع هذا من العروض وفما شكون خانتو نرجسيتو.و حط في بالو انو شنيا هي بكلها وطاح يهندس هاو مايسترو عالركح في وسط العرض اامنشد ينشد وهو متصدر فوق طابوري …تعب !!! والا تلقاه فريق العمل القاعة معبية بالجمهور والا المسرح معبي وهوما مزالو يركحو في ال scène والمنشدين يحوسو بسروال دجين ويسوقرو!!!هذي بروتوكولات عربون في عرس راهو.مش عرض يحب ينافس العروض الكبار عيشكم ويصلح حالكم..و مش معقول زادة الركح معبي بالجمهور والا شكون يعرف عليهم في وسط الركح بتاليفوناتهم في وجه المنشد حالين ديراكت ..وينو تنظيمكم؟؟؟ مالا يطلعو هكا على قرطاج؟؟؟ …و الا يحبو يربحو شويا فلوس يتفاهمو مع جماعة الاضاءة الارخص في الولاية يبدا مستانس بالشان ستيريو في سهرية باك والا حمام عروسة يعملهم ال jeux de lumières اخضر واحمر وموف في عينين الجمهور والفرقة في الظلام!!!! مع اظافة احيانا شويا هاك الدخان الي يسيبوه لا عاد ترى مغنين لا وزانة …وعادة الي ياخذ الكلمة بش يغني يكون تحت الاضواء بش البعيد يعرف شكون الي قاعد يتكلم…هذي امور بديهية حتى عرابنية صغار يعرفوها..ومانعرفش فما مشكلة صغيرة يعملو فيها العروض هذي بخلاف الزيارة حكاية الكوليقراف الي يحطوه يتهز ويتحط مطبس والا راقد يتخمر في وجه المنشدين…علاش ما نراوش هذا في عرض الزيارة..الكوليقراف يجي على جنب السان عيشكم..بش ما يخبيوش المنشد على الجمهور ويمهمشوه…وبربي كيكون عندكم عرض متواضع جدا و تتعمدو على اسماء كبار في الميدان كضيوف شرف مافيها باس لوكان يلتزمو بالركح ويحترمو الجمهور ويزيهم مالنفخة الفارغة وما يطلعوش عالركح بسروال دجين وكبوط يخدمو..المفروض خالصين والي يمشي على بقية المجموعة يمشي عليهم الي يتكبر ما يلزمكمش راهو يقزمكم انتوما …حتى ولو.كان بش يطلع يغني معاكم بمزيتو مش بالفلوس (وهذا مستحيل حسب ما نتبع)لابد من احترام الركح ونوع العرض والجمهور وما يستغلش انو معروف ويستسهل الموضوع كاينو هو.كبر عالركح…نعلمهم الناس هاذم الي راهو لليوم فما فنانين كبار يتعرضو للكاستينغ كيف يجيو يعملو مسلسل جديد..ارخف دورة مش باهيلك…عقلية كاملة لازمها تتبدل..نحضر في العروض الصوفية ونحضر في العراس كيف يجيبو فرق صوفية..و عمري ما شفت ناس تبدل في البنادر بالتلويح من قلب الركج للكواليس…حقيقة نحضر في عرس مع فرقة صغيرة ساعات نعمل كيف على التنظيم وال passe بين المشدين نحس روحي في عرض وساعات نحضر في عرض تقول عليا قاعدة في سهرية طهور منشد يغني كلمة ويمد الميكرو للجمهور يعاونو..الناس لكل تاعبة اسي…التنظيم و احترام الركح و وذن وذاكرة الجمهور من ابرز نجاح اي عمل فني من النوع هذا…ما فاها باس كان كل وا حد يدرس مشروعو قبل ما يعمل تيكيات ويحطهم للبيع..اعملو التيكيات حتى ب50دينار نجيوكم راهو المهم نخرجو مستمتعين بحاجات فاها خدمة وبحث وتعب وصحة وفرحة وكان عالبنادر الناس لكل تضرب وفي المجموعة حتى الخلواض يضهر باهي وكان عالاصوات كيف تكون مش موضفة comme il faut تضيع…ساعات فما عروض بلاش الواحد ما يقعدش للاخر فاها مش بالفلوس..كان يمشي يصب بيهم كارطة ب10لاف ويعدي فورفي انترنات ويتفرج عالفن الصحيح يطلع رابح مالشيرتبن …وسط كل ها التخلويض فما نقطة ضوء ….فما عرض ممتاز اخراجا وتوزيعا واضاءة وتوزيع ادوار واحترام الركح و وذن الجمهور «عرض ننده الاسياد» مع شويييا روتوش متاع1% نتصور لوكان يلقى الدعم اللازم يفوت الزيارة وعلى فكرة الزيارة والعرض الي نحكي عليه لنفس المخرج..اظن انو العرصة الي لازمها تكون صحيحة في الخدمة هذي هي عرصة الاخراج ثم في ما بعد الدعم حاجة مهمة ايضا… الحاجة الباهية انو في تونس عنا اصوات عااالمية كتسمعها لسانك وحدو يقول ماشاء الله عالخامات و المساحات. الصوتية والطبقات والمراوحة بين القرار والجواب يا ريت يجي منتج قوي ماديا وفنيا ويلمهم في مجموعة وحدة ويطلع منهم الشهد المفيد يحترم الي ذكرناه بكري ونعاودوه تو…الوذن الي بش تسمع..وذاكرتها..و الركح و قدرات الي بش يعطيهم الميكرو…ونحن نشجعوهم بالحضور و نمشيو معاهم حتى للخارج..اعطيونا الفن..نعطيكم من وقتنا وفلوسنا بقلب فرحان وعين تضحك….و لكم سديد النظر

محرز العماري

محرز العماري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *