الكامرا المخفية في القنوات التلفزية

 بقلم درصاف المهري 
بعد ما كانت الكاميرا الخفية سلسلة فكاهية ترفيهية خاصة بشهر رمضان المعظم..اصبحت «الطبق الرئيسي» لمائدات التلافز وهي الاساسية والوحيدة تقريبا المعتمدة في كل التلفزات والاذاعات..عاهدك بروحك تتفرج في ولد يلوج على مرت خال جدو بش يعطاها خمسطاش ألف تسلفهم من عندها عام ككح وتقشعر الابدان والناس تتأثر وتبكي احيانا وحيني كان بعد شهرين تلقاه السيد هاكا يخدم في فرقة القناة والمرا هي الي تمكيج للضيوف والالفين فرنك متاع المصور…ماهو لاباس نحل التلفزة نلقى لخرة تتغصور على ولدها ما راتوش عند بوه واجهزة كشف كذب وهي تفشلم عالخلق ويتضيحكو في الكواليس وقدّامنا ..اش دخلني ؟ منين نعرفها؟ماهو لاباس مرضتو الناس بالكذب ؟ ولا الاخرى الفنان الفلاني ما تكلموش على خاطر نقدتو واتهجم علاها تخرج على نيتك باش تعمل قهوة تلقاها هي وياه يعملو في قهوة و ضحكهم واصل لمحطة اللواجات…وبعد خمسطاش حلقة يقولو راهي فدلكة وقتها تكون كل الجرايد كتبت..وكل المدونين خذاو باي وكيف يوليو يتقلقو ويتحاصرو في حياتهم يحلو على جلغهم المنفوخة بالبوتوكس…المشكلة تلقاهم لا يدخلو في السياسة لا يعرفو شكون شادد الحزب الفلاني لا شكون سرق لا شكون رجع الحق لا يبلّو لا يعلّو وحافظين غناية واحدة وحيدة..الدولة ويني..يااا فرارات انتوما وينكم؟ الي تجي تكلمها في بلاطو تقلك انا ننتبعش سياسة..والي تقلو شنيا الخدمة يقلك نستناو في الدعم من الوزارة..ايه..شكون لاهي غادي؟ يقلك مش الوزير؟ يا ولدي شسمو و وين تجي الوزارة؟ ما يعرفش…ما عندكمش موقف من بلادكم وترعشو في الاضواء…ماعندكمش حق تكونو.محايدين..تدخل لبروفيلاتهم لكل على بعضهم تلقاهم اما يبارطاجيو في تصاور بورقيبة والا فماش ستاتي «كنا قبل خير» والا بلادنا فقرتها الثورة…(منعممش طبعا) وتره ادخل مع واحد منهم في نقاش ..يسمعك السلم الموسيقي لكل ويزيدك مفتاح الصول ..و الا يعطيك سطرين من سيناريو يحضر فيه لفيلم اباحي….وقتها يوليو يفهمو…مالا علاش تمسكيو وتكذبو في التلافز ا سيدي؟ شطر النقد ماشي حنّة كما يقولو قنوات تتجند بمئات الملاين بش يعديلنا برامج للشعب بشكل منوعاتي ومضمون كاميرا خفية..يا اولادي تعرفو كيفاش؟ نحيو علينا ها المصبات متاع الزبلة وخليو كعبتين وكعبة وحدة للاطفال ووحدة ثقافية علمية ووحدة دينية وطرف مسلسلات هاك القدم معمولكم لربي خلي نرجعو لكلامنا وتربيتنا الزمنية قريب نساوها مالخلط الفاسدة وتو الاخبار يعداها خميس بوبطان يشدو بصحيحتو و النشرة الجوية و الاشهار يخليوه لهاك البنوتة رانيا و البرامج الصحيحة تكفينا هاك المبدعة سماح مفتاح بالتناوب مع الياس القرقوري..ومستعدين نحن الشعب اتفكترولنا مع فاتورة الماء والضو دينار.دينار وتلموهم وتخلصو بيهم هاك البطالة الجدد متاع الاعلام بعد ما توقفوهم وتشرطو عليهم ما يراو حتى مليم الا ما يكتبو كتب يلتزمو فيه مالاختفاء مالساحة الاعلامية نهائيا والى الابد حتى يتوبو توبة نصوح ..تعبتولنا مخاخنا..عينينا…اعصابنا…مهمشتو اولادنا..شعلتو النار بين الناس…خربتو ديار…شتتّو عايلات بالكذب والتلفيق والاستخفاف بالمشاهد….الفنانين هاونا عندهم العروسات يسرحو على رواحهم من عرس لعرس الي تجي تعربن عليه يقلك completل 2022 براو اخدمو وابعدولنا على التلفزة الي تدخل لديارنا..والممثلين براو للمسرح والسينيما نفسونا حتى تتفاهمو على عمل تلفزي في المستوى…ما ضريناكمش لا الاعلاميين لا المخرجين..لا اصحاب القنوات..لا المغنين..لا الممثلين الي يقبلو الدور الي يجي هكاكا ..وانتوما ظلمتونا..دخلتولنا لديارنا وضحكتو علينا وخذيتولنا وقتنا واعصابنا وفلوسنا وتبيعولنا في مواد مسرطنة..علاش مش عيب وحرام؟؟ فيبالكم البارابول فيه 5000 قناة والا لا؟ يقول القايل اش لزك عليهم..لزني عليهم نحنو لكلامنا وللباسنا وللهجتنا ولغنانا منحبوش نبعدو عليهم..لكن للاسف لقينا الخير في قناوات خارجية تنقلنا المعلومة الصادقة والمسلسل النظيف و الفدلكة المقبولة واللبسة المحترمة وهوما قنوات يتعدو على الصوابع من جملة خمساللف..شي يفولج…احترمو عقولنا احترمو فهمنا احترمو انفسكم

محرز العماري

محرز العماري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *