كلمة و نص : تعليمنا يقطرولو

تكتبها : درصاف المهري

مربي اليوم موش هو مربي الأمس…و تلميذ اليوم غير تلميذ الامس و وليّ اليوم غير وليّ الامس…اليوم التلميذ الحياة سهالت قدامو كل شي متوفر باش يستقصي منه المعلومة عندو الانترنات بحر من البحار وعندو الايتيد يعمّل عليه بش يهزلو الاعداد من غير تعب يولي يستهزء بالدرس وما يعمّلش عليه برشى وخاصة يشوف قدامو اصحاب الشهايد كفاش شطر ملوحة في القهاوي لا خدمة لا قدمة وشطر يخدم في خدم مش قد شهادتو متاع تمرميد ..و يشوف الي ما كملوش تحضيري +3 حرقو و ولاو يعومو في الفلوس والكراهب مع عزايز الغربة و ورّقو بلا شهايد يطير الكيف مالقراية بطبيعتو ويولي التبطيل هدف و يحبو يجي. مالمدرسة مش منو..و يعتبر القسم والمدرسة او المعهد متنفّس من الانترنات الي خذاتلو غالبية وقتو و من الايتيد الي واخذ حيّز كبير من وقتو و حارمو من الحياة كما يحلم وما عادش عندو اوقات فراغ بش يرفّه عن نفسو ويلعب والا يعمل نشاط..اش يعمل..يدخل للقسم يشوّش.و يضحك عالاستاذ..ويتكومك..ويصور في المعلم باش في الساحة يعملو عليه ضحكة و يبزنس في زميلتو و يتعاند مع اصدقاؤو شكون يهنتل الاستاذ اكثر و يوترو اكثر باش يعمل اسم في عالم التكركير عالمربين ويعمل بادج ويولي عندو laisser passer عند البقية مالمربين وهكاكا ماعادش يقلقو حد يقلك سيب عليا منو قرى والا الله لا يجعلو باش قرا نكلموشي يهنتلني ويضحك عليا القسم وين نعرف عليه بالك مزطل والا محربش ما يهمو ما يعمل كان نمسّو من دبشو يرجع عليا كي ال ressort و ترصيلي في حل واربط ..و الا نكلموشي من هنا تتصْرَف عليا امو من غادي تعملي عرس قدام تلامذتي وزملائي تخليني قدّي قد القاع ؟ وهذا موجود.
ماهو ربي ولدك والا بنتك يا مدام ! في وجهك راهو !!!!.حتى مالحق ماعادش يلقاه..حتى الزملاء ينزلو فيه ركبة وقت الحاجة الناس لكل تحفر لبعضها كما المجالات لكل..احنا مزلنا نحكيو عالمربي المحترم الي عامل جهدو لكن الظروف المحيطة ما تعاونوش .و يخرج مريض باعصابو و بالدم و السكر و برا عاد معلم ومريض بالسكر..كل شي جايز ..عادي نهار من نهارات يشد واحد يفشخو من بعضو و هذا منحبوش نوصلولو ومش مقبول ولا معقول زادة……لكن هذا ما يمنعش وجود فئة مالمربين ربي يسامحهم والي سميتهم «تجّار المعلومة» علاقتو بالقسم والتلميذ مربوطة بمعلومات يصبها عالصبورة للتلامذة ويتعامل معاهم كأساتذة متخرجين كيفو و فرد مستوى يظن انهم فاهمين وعارفين كل شي جيست هو يذكر فيهم و اذا حب حد يفهم اكثر يقلو قيد في الايتيد عنا الوقت غادي خير ..وفما المعاملات تقرا ايتيد عندو يتغاضى على بعض الاغلاط و الي ما يقراش يتعامل معاه بجفاء بل وينبزو ساعات في القسم ويذكّرو بآهمية الايتيد..تقلي الاولياء هوما الي ساهمو في الحكاية هذي نقلك صحيح..اما لازم يكونو فرد كلمة مش واحد يقري وواحد يشد ولدو هكاكا بش يضطر الولي يقري ولدو كيف صاحبو فقط بش يحفظ كرامة ولدو داخل القسم وماعادش يهتنلو صغيرو فقط مش عالاعداد…فما اولياء زادة ما يحترموش المربي قدام اولادهم تلقاهم محلقين في ميعاد ويقلك «والله المعلمين لكل يلوجو كان عالفلوس والله لاهم عباد..لو كان يحط يديه على ولدي نطيحلو قدرو ..في ماعادش ضرب ..في نحطو في الحبس ..في نمرمدو..في مايعرفوش يقريو..ناجحين بالواسطة… و و » بربي التلميذ الي يسمع امو تحكي هكا منين باش يهاب المربي والا يعملو قيمة وقدر و يحترمو؟..المربي بيدو وقت يقري درسو مريقل وتجيه تعليمات من نقابي مايعرفش يكتب جملة مفيدة يقلو اضراب غدوة و يمتثل..يطرد تلامذتو والا يحضر ويقلهم منيش مقري..علاش يا Mr؟ يقلو حتى يزيدوني في الشهرية!!! بربي التلميذ اش تحبو يقول عليك..ماهو يقول كلام الولي صحيح وانتوما تحبو كان عالفلوس….؟!!! التلميذ يدخل للمدرسة يجري تقول هارب من عذاب الدار. و يخرج طاااير يجري تقول هارب من عذاب القسم الي يراه يقول كان محكوم اشغال شاقة…ماعادش حب المدرسة مغروس في التلميذ..مننساوش الوقت الي هو عامل مالعوامل الكبيرة الي ساهمت في نفور التلميذ ..اتخيل صغير قاعد فرد بلاصة من 4الى 5ساعات متتالية كفاش بش يفهمك..المعلم بيدو ما يقعدهمش..اذا طارت يقري ساعتين ويحول لقسم اخر .و التلميذ قاعد كالمحكوم بالحق …كفاش تحبو يقرا و الا يفهم..و الدراسات تقول انو التلميذ بعد ساعة نص في القسم يفقد التركيز ..الولي و المربي والوزارة والنقابة هوما لكل ساهمو في توتر العلاقة الجميلة الي كانت بين المربي والتلمبذ والولي..ولن تتغير ما داموا لم يغيّروا ما بأنفسهم هاذم لكل وعقليتهم جميعا ..منين كان التلميذ غاية فأصبح وسيلة و يستعملو فيه بعض الاطراف كدرع بشري و يلويو بيه في ذراع الحكومة وهذا الخطر ..

محرز العماري

محرز العماري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *