مراحل تطور الصباب

بقلم : درصاف المهري

من هنا بدأت القصة..من هنا بدأت الحكاية الوشاية او الصبة والقوادة بلوغة اوضح…. رسخوها في اذهان الصغير منذ نعومة اظافره داخل المدرسة الي المفروض اتربي و.ذلك في الفصل كيف يخرج المعلم .من خلال امر احد التلامذة انو يقيد عالسبورة المشوشيش..اما وقتها ما كانش يخلص لا 30 الف لا 200 الف كان يتسمى قواد بين الزملاءو يهز التيتر و يقاطعوه الاصدقاء لانو صباب اولا ثم لانو كذاب يزيد من عندو…. ويروح فرحا مسرورا واحيانا يبدل الوجهة باش يروح لدارهم يجيب على بوحاجب مرروا بالقصرين ثم اكودة باش يروح للمستير …. والا تركح البونية عالقوادة.والي عاينّاه انو عادة يكون من ذوي الاعداد والمعدلات المشرفة ويكون من عائلة لاباس بيها شويا..مش زواولية حت حت حبيت نقول القوادة مش مربوطة بالمستوى العلمي ولا الاجتماعي..هذا مرض ساري في العروق داخل العائلة بيدها مع تهليل من المتلقي ألّا هو طلع عنصر نافع في الغرف السرية …..الادهى من هذا كانو المعلمين يثمنوا على جهود القواد و ياخذو كلامو على محمل الجد ويوصلو يعاقبو المشوشين حسب الصباب ويضربوه وينقصولو اعداد في الشفاهي..يعني ماكانتش لمجرد التخويف او الردع….نااااادر جدا وين معلم خلوق يسامحهم…وفما باش منظلموش الوليدات زادة الي متربي في النظافة والاخلاق الطيبة وحتى كيف يختارو المعلم بش يكتب على السبورة المشوشين يكتب صحيح و وقت ما يشوف المعلم جاي سرعان ما يفسخ حتى بطابليتو وبيديه بسرعة و احيانا ياكل هو طريحة لانو خبى عليهم ويدخل للبحث والتحقيق اش كنت كاتب وعلاش فسخت وهات من هاك اللاوي..وفما الي ما يكتبش اصلا رغم القسم يغلي بالتشويش كطنجرة الببوش واحيانا يشوش هو معاهم ..وهنا يتسمى عند الزملاء الي متعودين يصبو كي يكونو في بلاصتو خواف جبان ومش راجل زادة ..مالصغرة يربيوهم انو الصبة تدخل في الشجاعة و الرجولية و الصدق في القول والاخلاص في العمل……لللاسف…. وبربي ما يحاول حد يقول مش صحيح خاطر نحكي على واقع اغلب الناس عاشتو .مافماش واحد منا ما نصبّوش المعلم عساس كيف يخرج هو للادارة…والى حد اليوم موجود .و احيانا يزيد من عندو يقلو سيدي راهو فلان قال رتحنا منو كيف خرج…..الي يختلف هي العقلية من مربي الى اخر حتى لا نعمم وهاكي الي احنا معملين علاها ….التلميذ الي يتربى على منطق القوادة ماهو يكبر علاها ويولي يطوّر من نفسو و.ينمّي مواهبو و قدراتو وامكانيات و يختلق طرق أبلغ وأسرع واكثر قبولا من عند. “عرفو” ان صح التعبير وما يصح كان هكا….و يولي محترف ببطاقة الاحتراف….و يزيد يلقى الام في الدار تخدّمو صباب على خوه الي معاه فرد مدرسة شكون كلم وقداش خذا عدد وشكون ضربو مالمعلمين..و لشكون عطا لمجتو وشنو عطاوهم تمارين وهو مخدمهمش وكلا على مرمتو..هذي فرصة اخرى للتطور..وزيد..يخدم صباب عالاب يعاود لأمّو بوه مع شكون قاعد في القهوة و يصب بأمو زادة مع شكون حكات في الحومة وشكون جا بحذاهم للدار من الجارات بعد ما قصد ربي للخدمة..وهكا يطلع صباب مالبريمة بكوارطو حوكي وحرايري وخاصة كان لقى الدعم المادي مالعايلة الام تعطيه 100فرنك والبو يشريلو 10 بيسات(بوتشي ) اقسم بالله يصب حتى بروحو ..واعملو عاد جهودكم دولة وشعبا و ارضا و سماء باش تربيوه واطلعوه راجل وتنحيولو الصنعة . ستفشلون حتما..الصبة في الصغر كالنقش على الحجر..ومحاولة ازالة هاته العاهة كيف الي يسيّق في البحر..لا البحر ينشح ولا الي يسيّق يفرح….من هنا بدات مشاريع انتاج الصبابة المحترفين اصحاب السوابق ..

 

محرز العماري

محرز العماري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *