فهمتكم غير درج

كتب نورالدين الغيلوفي :

خطبة الرئيس الأخيرة كما هي من المصدر: شوي وسع بال وتفهمو المقول:
متن الخطبة:
(( رئيس المجلس في ليبيا إن شاء الله قادم إلى تونس وباش نعرفو ماذا تم التوصل إليه في الجانب الديبلوماسي خاصّة كما تعلمون أنّ وزارة الخارجية هي عضو في الحكومة ولكن الشؤون الخارجية تعلمون أن ال.. أنها من اختصاص رئيس الجمهورية.. فحتّى يقع التنسيق ماذا تم التوصل إليه؟ وما هي المشاكل التي لا تزال عالقة والمسائل التي يمكن أن يكون تمّ الحسم فيها.. يعني حتى يكون هناك دولة واحدة.. المهم أن تكون هناك دولة واحدة بمؤسساتها بممثليها في كل المجالات.. الحديث هذه الأيّام تعرفون ماذا حصُل من حديث لا أريد أن أدخل فيه ولكن مخجل جدّا هو هذه في… بعد… سنوات طويلة في العمل القانوني في الإدارة وأنهم يتحدثون عن انقلاب دستوري.. هو الدستور.. تي نحن في ظل الفصل 80 حالة الطوارئ.. هي في ظل الفصل 80.. معنى كيفاش ينجمو يتحدثو عن انقلاب دستوري؟ الانقلاب.. هو انقلاب على الشرعية وليس بنصّ الدستور.. يعني الدستور يمنح رئيس الجمهورية اختصاص معيّن في ظلّ شروط معيّنة في ظل تدابير معيّنة.. معناها تقريبا لربّما قصّة متاع 40 سنة يقرا في الفقه ومن بعد جا للشيخ قالّو: منوبية آش تكون من ربّي؟
معنى هكّا 40 سنة يقرا في الفقه وفي الآخر جا قالو منوبية آش تكون من ربي.. الناس تتحدّث عن انقلاب.. تي هو الفصل اللي يطّبّق توّا حاليا هو التدابير الاستثنائيّة.. حالة الطوارئ من التدابير الاستثنائية بناء على الدستور معناها مؤسف جدّا هو أنّو يتمّ التركيز على مسألة محسومة دستوريا معناها التناقض في ذاتو.. كيفاش يكون انقلاب دستوري؟ ما دام في ظل الشرعية.. الانقلاب هو خروج على الشرعية.
نحن لسنا دعاة انقلاب ولا دعاة خروج على الشرعية.. دعاة تكامل بين المؤسسات.. صحيح هناك وجهات نظر مختلفة.. تصورات مختلفة ولربما.. ولكن في ظل دولة واحدة ولها ديبلوماسية واحدة ولها تكامل بقطع النظر عن الاختلافات مع ال… في وجهات النظر أو في المقاربات ولكن لا بدّ من أن يكون هناك تنسيق كامل بين مؤسسات الدولة.. وا.. يعني لا يمكن أن تدار الدولة بشكل منفصل كلّ ااا.. الدولة وحدة.. مؤسسات مختلفة ولكن تعمل في إطار دولة واحدة في إطار القانون.. يعني تو الجانب الديبلوماسي الجانب العسكري الجانب الأمني نحن دولة وحدة.. هذي بدعة حتى ال… موش الحديث عنها ومن كان وراءها والرؤساء الثلاثة.. ثمة رئيس دولة.. ثم رئيس حكومة ثم رئيس المجلس النيابي وكل واحد في اختصاصو.. في إطار التكامل.. في إطار التشاور.. ممكن هناك اختلافات في وجهات النظر.. تصوّرات مختلفة.. الأمر طبيعي في كل دولة وفي كل نظام وحصل حتى في ظل الحزب الواحد هو كان نهارة التأبين متاع المرحوم أحمد المستيري.. معناها كانت تعددية سياسية في داخل الحزب الواحد.. ولكن لا يجب أن تحصل مثل هذه النقاشات على رؤوس الملإ لأنها تمسّ بالدولة… فمؤسف جدا أنّو يتم الحديث عن هذه المسائل.. هاو التسريب.. من المفارقات أنك أنت يجيك جواب تجيك رسالة تولّي أنت المطلوب.. هذي الدنيا بالمقلوب… أنت تلقّيت رسالة تولّي انت المطلوب.. إيه شوف شكون اللي بعث الرسالة.. تسريب.. قريب نعملو ورزاة للتسريبات أحنا.. في الوضع الحالي.. وفلان مشى وفلان دخل وفلان سهر.. ولاخر خرج وما قالش ولاخر.. معناها نحن دولة وحدة ودولة بالفعل تقوم على المؤسسات.. دولة تقوم على احترام القانون.. احترام الدستور في المقام الأوّل مش ال.. المسائل ذات العلاقة بالأشخاص.. نحن نختلف في المقاربات نختلف في التصورات.. في تأويل بعض النصوص.. تي هاو يقول لك فعّل الفصل 80.. تي هو موجود توّا.. ها تو في ظل حالة الطوارئ الفصل 80.. تختلف في التدابير الاستثنائية وكان يحبو يشوفو يرجعو على الأقل.. للقوانين يشوفو شني الأصناف والأنظمة القانونية متاع التدابير الاستثنائية.. ثم شروط ثم بطبيعة الحال تقدير من رئيس الجمهورية .. السير العادي لدواليب الدولة إلى آخر ذلك.. وثم من النصوص الكثير إن أرادوا أن يعودوا إليها أو أن أشير عليهم بها في تونس عن هذه التدابير الاستثنائية.. حتى قبل وضع دستور 59 .
أنا أردت بهذا الاجتماع أن أتحدث عن هذه المسألة وأردت أيضا أن يقوم القضاء بدورو كامل في ظل هذه الأوضاع المتردية اللي تمس بالدولة.. وثمة النيابة العمومية اللي يلزمها تتحرك من تلقاء نفسها.. ومن يريد أن يتحصّن بالدستور وبالحصانة إلى آخر ذلك فليتحصّن بها.. ثمة على الأقل 25 شكاية ومشات من وزارة العدل ولم يتمّ النظر فيها من قبل المجلس.. ولم يتم عرضها على الجلسة العامّة.. في عام 59 تم رفع الحصانة عن نائب عمل حادث مرور في جهة طبرقة.. تم رفع الحصانة.. وثم عمليات رفع الحصانة كانت تصفية حسابات في أحداث 26 جانفي 78. بعض الأشخاص موجودين في حالة تلبّس.. بعض الأشخاص موجودين في حالة فرار.. لأنّ الوضع ولّى يمس الدولة التونسيّة.. هو يمارس في صلاحياتو بناء على النص تقول له انقلاب.. تونس دولة الخبراء.. مليون ونص خبير تقريبا عنّا في تونس.. يمرروا في قضايا يتم افتعالها وفي نفس الوقت يتم التسويق لها.. أنا ما نهتمّش بيهم تماما أصلًا.. الدولة واحدة مؤسساتها واحدة القانون واحد.. وعلى من يطالب بتطبيق القانون فليطبّقه.. تو كي ال.. في المجلس إيه علاش ما تعدّاوش هاذوما.. ثمة قداش من قضية متاع تحيّل وقضية متاع تهريب مخدرات وقضية متاع تهريب.. لا هانا قاعدين.. شبيه خير من الناس؟ هو يتمتع بالحصانة تي إيه.. أنتِ كمجلس علاش ما تحطهاش قدام المجلس؟ كان قال لأسباب سياسية ترفض هاكا عندك الحق باش ترفض.. ولكن مش نخبّيها ونقعد نساوم بيها.. ونحب نقول للشعب التونسي راني دائما على المبدإ وثابت ولا أقبل معناها التنازل عن المبادئ التي ال… انطلقت منها.. معناها لا باش ندخل في مناورات ضد هذا وضد لاخر.. ما نعمل كان تحت الأضواء.. واجب التحفظ بالنسبة لأمن الدولة وبالنسبة للمسائل ذات العلاقة بالدول الأخرى.. قالوا محتوى المكالمة الهاتفية.. يعملها مسرحي معناها في التلفزة.. محتوى المكالمة الهاتفية.. يسمع فيّ أنا شنوّ نتكلّم والّا شنو ما نتكلمش.. والكلّه من قبيل الخيال.. غريب معناها اللي ياقع في تونس غريب.. أنا المعني بالأمر لولا واجب التحفظ لحدثت عن مضمون المكالمة ولاخر، لا عندي المحتوى بالضبط.. المسألة مش مسألة أشخاص المسألة مسألة دوْلة تونسية.. دولة بمؤسساتها ماهيش دولة بتسريبات.. بالتسلّل.. هذا قال ولاخر ما قالش.. تي ثمة ناس مطالبين للعدالة.. وتو يجي وقت وتتحل ملفاتهم.. ويتحدثوا لا ومحللين كبار في السياسة.. محللين في السياسة وعندهم لخبار.. ثم ناس مطلوبين للعدالة.. وسيحالون على العدالة.. تي نقابل فلان.. تي ماهو لاباس تقابل فيه.. ثمة ديبلوماسية برك ما ثماش عشرة.. لاخر منطق قاعدين يلعبو شكبّة شكون يشكّب.. ماهيش دولة تشكيب.. في عوض نتلهاو بمشاريع قوانين تهم التونسيين..
على كل حال هذا اللي حبيت نقولو ليكم وحبيت نوري للشعب التونسي رانا دولة مانش مجموعة من العصابات.. لا نعمل في الظلام.. ثابيتن على المبادئ.. لا وجود لتحالفات هكا في الظلام وإلا في السر وإلا باش نتقابل مع فلان باش نتحالف معاه..لا ما نتحاف كان مع الشعب التونسي.. هذاكا هو حليفي.. ولا أخاف إلا الله رب العالمين.))
الإعجاب و المشاركة:
fb-share-icon0
20
Twitter20
Visit Us
Follow Me
139