نخرجو ومولاها ربي

بقلم :  الدكتور منذر الونيسي

الواحد يكون قاعد رايض على روحو يقري سويعاتو في الجامعة وتلامذتو فرحانين بيه
يروح للحومة يعمل سويقر وكابوسان والناس الكل تحبو وتسلم عليه
شايخ في دارو ومع صغارو وينبر ع الحكومات المتعاقبة
وكي يعيطولو يمشي يعاون وينقد
في قرعة الله اكبر
قالولو ولي رئيس وكبروهالو في مخو
شبيه المبزع والمرزوقي والباجي خير منك
والا الغنوشي يقعد يحكم في تونس وحدو بعد ما مات الباجي
شكون هم ؟ الله اعلم
ما نحرقش قبري
اصدم انت نظيف وزوالي وطيب والشعب فد م الاحزاب
والدولة العميقة فادة
قد ما عادينا الغنوشي وسبيناه
قد ما شوهنا النهضة ما ركنوش ومزالو يحكمو
وقد ما سب الاعلام وقشتل
وقد ما عمل الاتحاد شاطح باطح والاف الاضرابات
النافع ربي
وجاء الكوفيد وماتو الالوف
آش عملنا توة les enfants
يلزمنا ندقدقوهم
نحيبولهم نفس مومنة
وراجل طيب وزوالي وما يقعدش مع شكون يشم فيه ريحة خايبة
موش هذيكا الي نقصد
ريحة الثراء
مشات الحكاية هكاكا
ولكن
ربحت النهضة وقلب تونس التشريعيات
Quoi faire les frangins
الرئيس هذا باهي ويلزم يعبي بلاصتو
ويلزم بلابزية يحضرو الخدمة
وجات عبير وسامية والتبيني
وياجوج وماجوج
وولى البرلمان ديوان الورقلية
والأحزاب الحاكمة تتفرج في عجب ربي
في بالهم في امريكا
اضرب … ما حبش
عاقب … ما حبش
احكم بقبضة حديدية . ما حبش
واحد على نيتو ونفس مؤمنة اكثر من مولى المشروع وواحد آخر بايع الطرح وراكش
عبير عملت فيها مهبولة وسامية ديمة طالعة وسي محمد بعلها
ولى فيلسوف ووطني للنخاع
ودعا للانقلاب
وجاء نهار 25 لزرق
وخدمت ماكينة القوادة والازلام والبوليسية المكسرين
وصار تكسير وحرق مقرات وضرب وعنف
والدولة تتفرج
وتبنن على الثوار الجدد
وفي الليل
البيان رقة صفر عفوا واحد
نجوم تتباقص وكساوي محددة مجتمعين
ورئيس متغشش برشة
الحق مشى في بالي باش يندد بالعنف والتخريب
وخر وقدم وخزر لاعوانو وقال
C fini . Tout est caduc
لا برلمان لا حكومة لا وذني
ودخلنا على مؤسسات الدولة دقدق دقدق
وعملنا الي ما عملوش سيدنا علي في راس الغول
وطلعت عباد تزمر
ومن هاك النهار واحنا نزمرو
وضاع كل شيء الحرية والديمقراطية
والزبدة والشامية
والحليب والزيت ولى يتباع بالوقية
وما زالو برشة روس لحم يزمرو
وفرحانين
المهم الخوانجية لا
تونس تتدمر… آش يهمهم
ناكلو الظلف والغنوشي لا
الحاصيلو
كيما قال مقداد السهيلي هاك العام
شاح الماء في رياقنا… متنا بالشر
سيدنا… موش هنا
نعملو استشارة بشوية عباد ونعدو دستور بثمن التوانسة
ونزمرو
ونزيد نزمرو
لين ضبابطنا مشاو بالعرق
وريحة الصنان ولت تابعة حملة التفسير
آش عملنا توة
آش ناكلو… ووين نمشو
انا في بالي
نمشو. نرهزو
والا نخرجوا نهار 15 اكتوبر
ونقولولهم.. هما الي متخبين وراء الرئيس
وطد على حزب تحرير علىً شيعة علىً سنة مكرزين
على بياعة مازوط مهرب
على تجمعين فات فيهم الفوت
على جماعة مبنكين يستنو شكون يبكي لول
هاذم الكل
نقولولهم يزي من لعب الذري
واحشموا
ما تدمروش بلادكم وبلاد اولادكم
مالا نخرجو ومولاها ربي
Aucune description disponible.

nexus slot

garansi kekalahan 100